អង់គ្លេស៖ សមាគមបាល់ទាត់អង់គ្លេស (England FA) បានបញ្ជាក់កាលពីថ្ងៃសុក្រម្សិលមិញនេះថា ក្លិបបាល់ទាត់នៅក្របខណ្ឌ English Premier League ទាំងអស់បានចាយលុយទៅលើភ្នាក់ងារកីឡាករ (Agency) និងសេវាអន្តរការី អស់ប្រមាណជា ៣៩២លានដុល្លារនៅក្នុងឆ្នាំ២០២២កន្លងទៅ ដោយគិតត្រឹមខែមករានេះ។ តួលេខនេះមានការកើនឡើងប្រមាណជិត ៥០លានដុល្លារអាមេរិក បើប្រៀបធៀបទៅនឹងឆ្នាំ២០២១កន្លងទៅ។ 

ក្រុមការពារតំណែងជើងឯក Manchester City គឺជាក្រុមដែលចាយលុយទៅលើភ្នាក់ងារកីឡាករច្រើនជាងគេ ពោលគឺដល់ទៅ ៥១,៦លានផោន ជាពិសេសគឺនៅក្នុងអំឡុងការទិញដូរកីឡាករដ៏សម្បើម ជាពិសេសគឺការនាំចូលខ្សែប្រយុទ្ធសញ្ជាតិណ័រវេស៍ Erling Haaland ពីក្លិបអាល្លឺម៉ង់ Borussia Dortmund។ 

ដោយឡែក ក្លិបតោខៀវ Chelsea បានចាយលុយលើភ្នាក់ងារកីឡាករចំនួន ៤៣,២លានផោន និង Liverpool ចាយអស់ ៣៣,៧លានផោន និង Manchester United ចាយអស់ ២៤,៧លានផោន។ ដោយឡែក Nottingham Forest ជាក្លិបដែលចំណាយលើភ្នាក់ងារកីឡាករអស់តិចជាងគេ ពោលគឺត្រឹមតែ ៤,៤លានផោន ទោះបីជាក្លិបទើបឡើងមក Premier League នេះបាននាំចូលកីឡាករថ្មីច្រើនជាងគេយ៉ាងណាក្ដី៕